مؤمینه خانیم

باشینا دؤندویوم آی قوچ کوراوغلو
اگر ایگیتسن گل آپار منی 
حسرتدن یوخ صبری _ قراریم 
اینجیدیر سراسر آه _ زار منی

چنلی بئل اوستونده اسره میش نرسن
دوشمن قاباغیندا دایانان ارسن
تامام دلی‌لره ایگید سرکده سن
آختارسان تاپارسان دوز ایلقار منی


دمیرقاپی دربند عجب تاماشا
باتیب گؤزللری آلا-قوماشا
آدیم مؤمینه دیر آتام عرب پاشا
ایسته‌رم اؤزونه ائیله یار منی.


مؤمینه خانیم نامه نی تامام ائیله‌ییب،آتاسی‌نین عیسی آدلی بیر نؤکری واریدی
کنیزلریندن بیرین گؤنده‌ریب  عیسی نی یانینا چاغیردی،نامه نی نؤکره وئریب دئدی:
بو نامه نی آپار چنلی بئله قوچ کوراوغلونا وئر.
عیسی نامه نی گؤتوروب یولا دوشدو،گئجه_گوندوز یول چاپیب اؤزونو چنلی بئله یئتیردی،مؤمینه خانیمین نامه سین کوراوغلویا وئردی قاییتدی.
کوراوغلو نامه نین احوالاتین بیلیب سسلندی دلی‌لر،
خانیملار سسه چیخدیلار دئدیلر:
آی کوراوغلو سفرین وار؟
کوراوغلو دئدی:
دمیرقاپی دربنده عرب پاشانین قیزی مؤمینه خانیم بوینوما دئیین سالیب گرک گئدم اونو گتیرم.
دلی‌لر دئدیلر آی کوراوغلو یاخجی ائله ده قوی بیز ده سنینله گلک،
کوراوغلو راضی اولمادی،اؤزو تک آتلانیب دمیرقاپی دربنده یولا دوشدو.
هریئردن کئچیب گلیب دربنده چاتدی.
کوراوغلو یئرده قیر آتدا الینده دربند بازاریندا گزیردی،جاماعات اونا،آتینا مات قالمیشدی.
عرب پاشایا خبر آپاردیلارکی دربنده بیر آدام گلیب نه اؤزو بیزیم یئرین  آداملارینا  اوخشاییر نه ده آتی بیزیم آتلارا.
عرب پاشا کوراوغلونو یانینا چاغیردی،گؤرمه میشدی آنجاق آدین ائشیدمیشدی،کوراوغلویا دئدی:
کیم سن و هارالیسان؟
کوراوغلو جواب وئردی:
من آشیغام ایذین اولسا سازلا دئیم:
آلیب کوراوغلو گؤرک نه دئییر:


عرب پاشا سنه بیر عرص ایله ییم
یئریم خبر آلسان موراد بی‌لی‌یم
یاغی دوشمن منه قوقا باشلاسا
ایری قیلینج الده دوشمن قویلایام

باغ بسله ییب قیزیل گولون درمه سین
دریب سونرا یایلیق اوسته سرمه سین
مطلبه گلمیشم، مطلب وئرمه سین
سیغار وئروب میصری قیلینج توولایام

چنلی بئلدن بو دیارا گلمیشم
او یازلان دوز ایلقارا گلمیشم
کوراوغلویام نازلی یارا گلمیشم
گرلا گؤزلری سئچیب بویلایام.

سؤز تمام اولدو، عرب پاشا کوراوغلونو تانیدی، نه مطلبده گلدیگینیده بیلیب، وزیرینی یانینا چاغیریب دئدی:
وزیر کوراوغلو قیزیم مؤمینه نی ایسته ییر، بو حاقدا فیکیرین نه دیر؟
وزیر دئدی :
پاشا ساغ اولسون، چنلی بئلدن بورایا گلیب گرک وئره سن. وئرمه سن زورلا آپاریب هامیمیزیدا قیرار. بیر قیزدان اؤترو بو قدر قانا باعیث اولماق اولماز. یاخشی‌سی بودور کی قیزی وئر،اؤزونو ده قوشونا باشچی ائله.
عرب پاشا وزیرین مصلحتینه راضی اولوب، توی ائیله ییب قیزی مؤمینه نی کور اوغلویا وئریب.
کوراوغلو بوردا چوخ قالیب.
عرب پاشانین ایسته یینه گؤره دؤل اوچون قیر آتی ایلخی‌یا قاتدیلار. قیر آت بیر وقت ایلخی‌نین ایچینده قالیب، آنجاق اوردان  کهرنیشان بیر مادیان دوتدو، بالایا قالدی.
بو طرفدن کوراوغلو بیر موددت مؤمینه نین یانیندا قالیب. گؤنلرین بیر گؤنو چنلی بئل دلی‌لری یادینا دوشوب، مؤمینه یه دئدی:
من گئدیرم، چنلی بئل یییه سیزدی، دلی‌لر یولومو گؤزله ییر. آل بو قولباغی  ساخلا، قیزیم اولسا اونلادولانار، اوغلوم اولسا قولونا باغلا، گلر منی تاپار.
کوراوغلو قولباغی مؤمینه یه وئریب، حلاللاشیب قیر آتی گتیریب ،چنلی بئله یولا دوشدو.

کوراوغلو چوخدان ایدی کی دلی‌لردن،خانیملاردان آیریلمیشدی. کونلو اونلاری چوخ ایسته ییردی. قیرآتی یئلدن یئتگین، سودان ایتی سوروب چنلی بئله یئتیشیب. دلی‌لرله گؤروشوب، اؤپوشدو،حاللارینی سوروشوب. نیگار خانیم گؤروب کوراوغلو بوش گلیب، دئدی:
آی کوراوغلو، مؤمینه نی نییه گتیرمه دین؟
کوراوغلو گؤرک نه دئدی:

جانیم نیگار ،گؤزوم نیگار
آغلار قالدی یار نه دئیم؟
سنه قوربان اؤزوم نیگار
کؤنلومده آه _ زار نه دییم؟

آیریلاندا جاندان اولدوم
من  دیندن، ایماندان اولدوم
بیر حوری_قیلماندان اولدوم
دونیا منه دار نه دئیم؟

کوراوغلویام ملول اولدوم
قوربت ائلده ذلیل اولدوم
مؤمینه یه دلیل اولدوم
ترلان اولماز سار نه دئیم؟

بونلار بوردا قالسین، سنه دربندیده مؤمینه دن خبر وئریم، دوققوز آی ،دوققوز گون، دوققوز ساعات تمام اولوب، مؤمینه نین کوراوغلودان بیر اوغلو دونیایه گلدی. اوشاغین آدین حسن بی قویدولار.
حسن بی بؤیودو، اون سکگیز یاشینا چاتیب بویو بوخونو، خویو_خاصیتی کوراوغلویا اوخشاییردی، گؤزلری اویور_اویور اویناییردی، هئچ دینج دورماقلا ایشی یوخ ایدی.
بونو دؤیوردو، اونو سؤیوردو. هامینی الیندن زارا گتیرمیشدی. بو دینج دورمادیغی‌نین اوستونده اللم آیاق اولدوغو اوچون هامی اونا قورداوغلو * دئییردی. عرب پاشا دفعه لرجه اونو یانینا چاغیریب اؤیود ،نصیحت وئریردی، یئنه ده او اؤز بیلدییینی ائدیردی.
بیرگؤن اوینادیغی یئرده بیر کئچلی دؤیوب آغزین بورنونون قانینی بیر بیرینه قاتدی، کئچل اونون الیندن قورتولوب بیر یانا چکیلیب، دئدی:
من سنه نه ائله میشم، منی نییه دؤیورسن، آی آتاسیندان خبر سیز،سنین آتان یوخدور، کیم بیلیر آنان سنی کیمدی ؟
بو سؤزقورد اوغلویا اوخ کیمی دیدی، داغدان آغیر گلدی.
قورد اوغلو اوردان بیر باش آناسی‌نین یانینا یوگوردو،سوروشدو:
آنا منیم آتام کیمدی؟
مؤمینه خانیم کوراوغلونون اوغلو اولدوغونی دیمک ایسته مه دی. گؤزونون آغی،قاراسی بیر اوغلویدو،
یانیندان گئتمک اوچون دئدی:
اوغول سنین آتان یوخدو.
قورداوغلو دئدی:
آنا منیم آتام کیمدی،دوزونو دئمه‌سن سنی ده اؤزومو ده اؤلدوره یم.
سونوندا مؤمینه علاجی کسیلیب دئدی:
اوغول سنین آتان خانلارا،بیلره قان اوتدوران قوچ کوراوغلودور.
قورداوغلو دئدی :
بس ایندییه قدر منیم آتامین اولماغینی نییه مندن گیزله دیردین؟
مؤمینه خانیم:
قورخوردوم گئدیب تاپا بیلمه‌یه سن دوشمنلر الینه دوشه‌سن.
قورداوغلو آتاسی‌نین یانینا گئتمه یی دوشوندو . آناسیندان ایذین ایسته دی، آناسی اؤنجه ایسته دی ایذین وئرمه سین،گؤردو قالمالی دییل گئده جک چاراسی قالیب ایذین وئردی دئدی :
گئت باباندان دا ایذین آل.
قورداوغلو باباسی‌نین یانینا گلیب دئدی:
بابا منه ایذین وئر،چنلی بئله آتام کوراوغلونون یانینا گئدیرم.
عرب پاشا دئدی:
اوغول سن هارا چنلی بئل هارا،گئدیب آتانی تاپا بیلمزسن پاشالار خانلار هامیسی کوراوغلویا دوشمندیرلر دوتوب سنی اؤلدوررلر.
گئتمه قال،یاشیم گئچیب قوجالمیشام،قال منیم یئریمده پاشا اول.
قورداوغلو دینمه دی،عرب پاشا گؤردو قالمایاجاق آخیردا ایذین وئریب دئدی:
خزینه دن پول گؤتور ایلخیدان اؤزون بَیَندییین آتی آل مین گئت.
قورداوغلو خزینه یه گئتدی پول گؤتوروب گلدی ایلخینین ایچینه.هانسی آتی دوتوب میندی،آت داوام گتیره بیلمه‌ییب،بئلی قیریلدی،قیر آتدان دوتموش کهرمادیانین بیربالاسی اولموشدو،ایلخینین ایچینده ایدی.
او زاماندان بو زامانا هئچ کیمه رام اولماییردی.
قورداوغلو کمند آتیب،آتی دوتدو،گتیریب گوجله  یهرله ییب  میندی سوروب  دربند بازارینا چیخیب.قیلینجی یوخویدو. فتحعلی آدیندا بیر اوستانین یانینا گلیب آتدان دوشدو قیلینج ایسته دی ،فتحعلی اونا بیر نئچه قیلینج گوسته ریب،قورداوغلو قیلیشلاری الینه آلیب بیر بیر باسیب قیردی آتوب اوبانا، اوستا گؤردو بو هئچ هیر-تیر قانماییر دئدی:


جانیم اوستا منه بیر قیلیش قاییر
نه اوزون، نه گؤدن، بیر قرار اولا
دسته سینی شیرمایی، اؤزو قوشا نوی
ووراندا اؤرکدن خبر دار اولا.

خوراسان پولادین یاخشیسیندان سئچ
یاخشی اولماسا یامانیندان گئچ
هرنه یه ووراندا دایانمایا هئچ
یا فیل ،یا کرگدن،یا شاهمار اولا.

ایراقدیر منزیلیم،اوزاقدیر آرا
سویو چوخ سرت اولا،ایره‌نگی قارا
یاری جلغا پولاد،یاری نال پارا
قارا عقرب کیمی زهرمار اولا.

حسن بی کاماندار اؤتورمز اووو
کیمدیر بو دونیادا آتامین باوی؟
قایتمایا آغزی، ایتی قیلاوی
هر نه یه دَیَنده تارمار اولا.


آی اوغول من بیر کاسیب آدامام ،بیر بؤیوک کولفتلی ائوی دولاندیریرام،نییه قیلینجلاری قیردین تؤکدون یئره منیم بالا لاریمی آج قویدون بس نه ایسته ییرسن، سنه نئجه قیلینج لازیمدیر؟
قورداوغلو اؤنجه چیخاردیب قیردیغی قیلیشلارین پولونو وئریب سونرا اوزونو دوتوب گؤرک نه دئدی:
اوستا مطلبی آنلادی،قورد اوغلویا نئجه قیلینج لازمیدیر، بیلیب. اوساعات خوراسان پولادینین یاخشیسیندان سئچیب بیر قیلینج دوزه‌لدیب، دئدی:
آل بو سن ایسته ین قیلیشدیر.
قورداوغلو قیلینجی گؤتوروب، بئلینه باغلادی، اوستانین حاققینی وئریب. آتینی مینیب عرب پاشانین یانینا گلیب دئدی:
بابا، ایلخیدان بو آتی دوتدوم، خوشنا گلیر؟
عرب پاشا گؤروب قورداوغلو دوتدوغو آت کوراوغلونون قیر آتی‌نین بالاسیدیر، دئدی:
اوغول ،چوخ یاخشی آتدیر، یاخشی بول.
قورداوغلو باباسیندان آیریلیب حلاللاشیب آناسی‌نین یانینا گلیب،گؤرک نه دئدی: 

قورداوغلو
جانیم   آنا،    گؤزوم      آنا
روخصت وئر من گئدر اولدوم
سنه  قوربان  اؤزوم    آنا
روخصت وئر من گئدر اولدوم.

مؤمینه خانیم
جانیم اوغول گؤزوم اوغول
آللاها  تاپشیردیم  سنی
سنه قوربان اؤزوم اوغول 
آللاها تاپشیردیم سنی

قورد اوغلو
نصیحتلرین دوتارام
قانین قانلارا قاتارام
گئدیب آتاما چاتارام
روخصت وئر، من گئدر اولدوم.

مؤمینه خانیم
کوراوغلودور آتان ذاتی
چنلی بئلده وار بساطی
بازو بنددیر اماناتی
آللاها تاپشیردیم سنی.

فورداوغلو
شیرین سؤزون زولال ائیله
قارا قاشین هیلال ائیله
آنا سودون حلال ائیله
روخصت وئر من گئدر اولدوم

مؤمینه خانیم
مؤمینه یم سؤزوم زولال
گؤزوم گؤیچک قاشیم هیلال
سودوم اولسون سنه حلال
آللاها تاپشیردیم سنی.

سؤزلری تماما یئتیشیب، مؤمینه خانیم کوراوغلونین اونا وئرمیش اولدوغو بازو بندی گتیریب اوغلونون قولونا باغلایب دئدی:
یوللاردا اولمایا _ بیلمه یه  دئیه سن من کوراوغلونون اوغلویام آتانین دوشمنی چوخدور، سنی اولدورورلر، منی گؤزو یولدا قویما.
قورداوغلو آناسی ایله حلاللاشیب چنلی بئله طرف یولا باشلادی، اوچ گون، اوچ گئجه آت سوروب گلیب احمد پاشانین شهرینه یئتیشدی.
احمد پاشانین آداملاری قورداوغلونو گؤروب پاشانین یانینا آپاردیلار.
پاشا قورداوغلونین آتینا، اؤزونه باخیب دئدی:
نچیسن، هاردان گلیب هارا گئدیرسن؟
قورداوغلو گؤرک نه جواب وئریر:

احمد پاشا منیم یولوم
داغیستاندان گلر اولدو
واردیر قیلینج ووران قولوم
درد باغریمی دلر اولدو.

قالخانیم دوتارام باشا
الیمدن چکرسن حاشا
داغیستاندا عرب پاشا
نامرد مرده گولر اولدو.

حسن بگم، گلمم دیله
میصری قیلینج آللام اله
گوذاریمی چنلی بئله
عرب آتیم بیلر اولدو.

سؤز تمامه یئتیشیب احمد پاشا آداملارینا دئدی:
بو نه دیللی _ دیللی دانیشیر، دوتون قویمایین گئدسین.
پاشانین آداملاری قورداوغلونو دوتماق ایسته دیلر. قورداوغلو قیلینجی چکیب اونلارین هره سینی بیر یانا قووالادی، آتینی سوروب آرادان،چیخیب چنلی بئله طرف اؤز قویدو. بیر داغین باشیندا ایکی بزیرگانا راست گلیب. گؤردو بزیرگانلار یاخشی شئیلری وار. قورداوغلو بزیرگانلارین نه کی مالی واریدی اللریندن آلیب اؤزلرینی بوش یولا سالدی.
بزیرگانلار قاچیب یاخینداکی شهرین پاشاسی جعفر پاشایا شیکایت ائله دیلر.
جعفر پاشا،باشندا آداملاری آتلانیب قورداوغلونون قاباغین کسیب دئدی:
بزیرگانلاری نییه سویدون؟کیمسن هارا گئدیرسن؟
جوابیندا گؤرک قورداوغلو نه دئدی:


گل سنه سؤیله ییم آی جعفر پاشا
یول چئئویریب چنلی بئله گئدیرم
دوشمنلر الیمدن چکرلر حاشا
یول چئویریب چنلی بئله گئدیرم

آت اوینادیب چنلی بئله چاتارام
آسلان کیمی دره لرده باتارام
کمند آتیب ایندی سنی دوتارام
یول چئویریب چنلی بئله گئدیر

آنامین یولوندا قولو باغلییام
آتامدان آیرییام سینه داغلییم
آدیم حسن کوراوغلونون،اوغلویام
یول چئویریب چنلی بئله گئدیرم


پاشا دستور وئردی قورداوغلون دوتسونلار آتلیلار قورداوغلونا هجوم ائیله دیلر،قورداوغلو ال قیلینجا آپاریب قوشونا جومولدو،آتلیلار داوام گتیره بیلمه دیلر هره سی بیر یانا قاچیب،قورداوغلو داعوادان ال چکیب یولونا دوزه لدی،
ایکی گون ایکی گئجه یول سوروب یولدا  بیرقوجایا راست گلیب،گؤرک قوجادان نه خبر آلیب:

قوجا بابا من دولانیم باشینا
سؤیله کوراوغلودان منه  بیر خبر
گؤرن چنلی بئلده قورورمو دوران؟
سؤیله کوراوغلودان منه بیر خبر

غواص کیمی دریالارا دالارام
مؤحنت یوردونا تالان سالارام
یاغی دوشمنلردن قیصاص آلارام
سؤیله کوراوغلودان منه بیر خبر

حسن بی ده  ایگیت جاوان یاشیندا
اؤلدورر نامردی،مردساواشیندا
چنلی بئلده دلیلری باشیندا
سؤیله کوراوغلودان منه بیر خبر

سؤزتمامه یتیشدی قوجا دئدی:
 اوغول چنلی بئله یاخینلاشیبسان. بیر آز آت سورسن یئتیشرسن‌. قورداوغلو اوردان گئچدی،آتینی سوروب یول گئتمه یه باشلادی گون باتان زامانی گلیب چنلی بئله یئتیشدی.
یول گلیب یورولموشدو ،دوشوب آتینی قوروغا بوراخدی اؤزو ده دیرسکلندی.
دلیلردن بیر نئچه سی: ائیواز، دمیرچی اوغلو، عیسی بالی آت بئلینده مشق ائیله ییردیرلر. قوروقدا بیر آتلی آدام گؤردولر.
ائیواز دئدی: سیز بوردا دورون، من گئدیم گؤروم آدام کیمدیر.
ائیواز آتینی سوروب قورداوغلونون یانینا گلدی، دئدی: آی آدام کیمسن؟ نه هؤنرله آتی بو قوروغا بوراخیبسان؟
قورداوغلو دینمز، سؤیله مز یئریندن قالخیب، چکیب ائیوازی آتدان سالیب یئره ییخدی قوللارینی باغلادی.
یولداشلاری گؤزله دیلر، گؤردولر ائیئواز گلمدی، اونون دالیسیجا دمیرچی اوغلو گلیب. ائئیوازی قولو باغلی گؤروب قورداوغلونا هجوم ائله دی. قورداوغلو ماجال وئرمه ییب چکیب اونودا آتدان سالدی، قوللارینی دالدان باغلادی، ائیوازین یانینا اوزالتدی.
عیسی بالی گؤزله دی، گؤردو ائیوازلا دمیرچی اوغلو قایتمادی بو دؤنه اودا آتینی سوروب گلیب، یولداشلارینی قولو باغلی گؤردو.قورد اوغلونون اوستونه یوگوردو، قورداوغلو اونودا آتدان سالدی قوللارینی باغلادی، ائیوازلا دمیرچی اوغلونون یانینا ییخدی.
دلیلر اوزاقدان بونو گؤروب قاچیب کوراوغلونون یانینا، احوالاتی سؤیله دیلر.
کوراوغلو قیلینج باغلادی، قالخان آسیب، عمود گؤتورودو قورداوغلونون یانینا گلیب، دلیلر کوراوغلونا گؤز ائیله دیلر کی اولمایا بیلمیه ال قالدیراسان. آدینی دییرسن،اؤزونو نیشان وئررسن، هامیمیزی قیردیرارسان.

کوراوغلو قورداوغلونا یاخینلاشیب دئدی:
اوغول هاردان گلیب هارا گئدیرسن؟
قورداوغلو دئدی:
داغیستانداندان گلیب چلنی بئله گئدیرم.
کوراوغلو دئدی:
اوندا بوردا نه گزیرسن؟
قورداوغلو دئدی:
به بورا چنلی بئل دئیل می؟
کوراوغلو دئدی:
یوخ ،بوردان چنلی بئله بیر منزل یولدور.
قورداوغلو ائیله بیلدی کی یولدا راست گلدیگی قوجا اونا یالان ساتیب آلدادیب. چنلی بئلی دوز نیشان وئرمه ییب. آلدی گؤرک نه دئدی:


داغیستاندان چیخدیم باهار فصلینده
گزه _ گزه بودیارا یئتیشدیم
باج وئرمه دیم دوشمنلردن باج آلدیم
چوخون سالدیم آه _ زارا یئتیشدیم.

آنامدان آیریلدیم من گلدیم بئله
دوشمن قانینی دؤندردیم سئله
گزه  _ گزه گلدیم بو چنلی بئله
چکسه لرده منی دارا  یئتیشدیم.

حسن بی یم هر یارایا دؤزمه رم
قیلینج الده قالخان بئلده گزه رم
دلیلرین من یان یانا دوزه رم
سن اولارسان گونو قارا یئتیشدیم

سؤز تامام اولدو،کوراوغلو گؤردو بو خوشلوقلا دلیلری بوراخمایاجاق، آجیخلاندی میصری قیلینجی چکیب قورداوغلونا هجوم ائله دی،قورداوغلو دا قیلینج چکیب اونا یؤنه لندی، قیلینجلار ووروشدولار، قیلینجدان موراد حاصیل اولمادی، ال عمودا آتدیلار، عموددان بیر ایش چیخمادی . بیر-بیرینین بئلینه ال آتدیلار،دولاشدیلار،بیرقدر گولشدیلر،یورولدولار،بیر-بیرینه زور ائیله یه بیلمه دیلر،آرالاندیلار هره سی بیریاندا اوتوروب ،یورغونلیغین آلدیلار،قالخیب یئنی دن دولاشدیلار...


قورداوغلو بو دفعه بیر زور وئریب کوراوغلونون دیزلرین یئره یئتیریب،بیر ده زور وئردی کوره یینی یئره گتدی،سینه سینده اوتوروب دئدی:
سؤیله گؤروم قوجا سن کیمسن؟
کوراوغلو دئدی:
باشیمی کسسن ده اول سن کیم اولدوغونو دیمه سن،من کیم اولدوغومو دئمه رم،
قورداوغلو،کوراوغلونون سینه سیندن قالخیب اونو بوراخیب دئدی:
گل اؤزونو بیربئله بؤش یئره اینجیتمه،کیم اولدوغونو نیشان وئر،آلیب کوراوغلو گؤرک نه دئدی:

کوراوغلو
نه ائیلیرسن مندن سؤز خبر آلیب
دوشمن قانین یئره جالایان منم
قوشونلار تالاییب توپلر داغیدان
 دوشمنی اوست _ اوسته قالایان منم

قورد اوغلو
غیظه گلیب هردم نعره ووراندا
دلیلر قول قولا باغلایان منم
قیلینج چکیب مرد مئیدانا ووراندا
سینه لر چال-چاپراز داغلایان منم

کوراوغلو
ایگید اولان هچ آیریلماز ائلیندن
ترلان اولان سونا وئرمز گؤلوندن
ائللر زارا گلیب جوومرد الیندن
لش لشین اوستونه قالایان منم

قورداوغلو
قاچیتدیم قووقادا مئیداندان پاشا
قوووب تاجیرلری دولدوردوم داشا
آخیردا الیمدن چکرسن حاشا
باشی باش اوستونه قالایان منم

کوراوغلو
کوراوغلو دییلم،اونا میثالام
هم رستم زالام همده سالسالام
نئجه خودکارلاری تختیندن سالام
قنیملر اوستونده اولایان منم

قورداوغلو
حسن بی یم  مرد مئیداندا قالارام
قنیملر باشینا قیلینج چالارام
یاغی دوشمنلردن قیصاص آلارام
سئچیب اکین گؤوهری ساخلایان منم.


سؤزتمام اولدو بیر ده گولشدیلر، قورد اوغلو بو سئری ده کوراوغلونو ییخیب دئدی:
بو ایکینجیدیر ،بیر ده ییخسام اؤلدوره جه یم.
بونلار بوردا قالسین، سنه نیگار خانیمدان خبر وئریم. دلیلرین بیری قاچیب نیگارخانیما خبر آپاردی کی، بیر آتلی گلیب چیخیب دمیرچی اوغلونو، ائیوازی، عیسی بالی نی ،دوتوب قوللارینی باغلاییب، کوراوغلونو دا ایکی دفعه  ییخیب، بیر ده ییخسا اونو اؤلدوره جک.
نیگارخانیم تله‌سیک اؤزونو اورایا یئتیردی.گؤردو کوراوغلو ایله قورداوغلو اوچونجو دفعه دوتوشوبلار. نیگارخانیم نه قدر ائیله دی اونلاری بیر _ بیریندن آرالاسین، قورداوغلو آرالانمادی، دئدی:
داعوانی تامام ائیله یک.
کوراوغلو ایله قورداوغلو چوخ گولشدیلر. آخیردا کوراوغلو بیر دلی نعره سی چکدی قورداوغلونو گؤتوردو یئره ووردو، سینه سینه چؤکدو، میصری قیلینجی چکدی باشینی کسسین، نیگار خانیم ایره لی یئرییب الیندن آلدی.
کوراوغلو دئدی:
اوغول، سنی اؤلدورمه دیم بوراخدیم، لعنت شیطانا دئ اؤزونو نیشان وئر کیمسن. آلدی قورداوغلو گؤرک نئجه اؤزون تانیتدیریر:

آنادان اولاندا جوومرد اولموشام
شیرین لهجه لییم خوش نیشانلییام
مئیداندا دوشمنه قانلار آغلادان
بیله یی قووتلی گؤزو قانلییام.

جوانکن اؤزومو چؤللره سالدیم
غم منی چولغادی دریایا دالدیم
هر یئرده نامرددن قیصاصیم آلدیم
مردلر آراسیندان آدلی سانلییام.

بیر درد بیلن یوخدور دردیم باغلییام
دوست یولوندا من ده  قولو باغلییام
حسن بی یم  کوراوغلونون اوغلویام
یئریم خبر آلسان داغیستانلییام.

سؤز تامام اولدو.کوراوغلو دئدی:

یالان سؤیله ییرسن، آلداتماق ایسته ییرسن. کوراوغلونون اوغلو اولسان بیر نیشانین اولمالی ایدی.
قورداوغلو قولوندا کی قولباغی آچیب کوراوغلویا گؤستردی. کوراوغلو گؤردو اؤزو وئردییی قولباقدیر گؤرک نه دئدی:

باشینا من دؤنوم گول اوزلو اوغول
کوراوغلو دئییلن ایگید منم من
دلی پاشالاری تختیندن سالان
کوراوغلو دئییلن ایگید منو من

موخنث اولوبدور قاباغیمدا خار
خودکارا یوردونو ائیله میشم دار
سؤیله مؤمینه دن نه خبرین وار؟
کوراوغلو دئییلن ایگید منم من

آفرینلر  قایناغینا ،جوشونا
یاغی دوشمن گله بیلمز توشونا
کوراوغلویام ،اوغول دؤنوم باشینا
کوراوغلو دئییلن ایگید منم من.

سؤزتامام اولدو،آتا اوغول قوجاقلاشدیلار اؤپوشدولر دلیلرین قوللارینی آچیب چنلی بئله گئتدیلر. بوندان چوخ واخت گئچدی کوراوغلو دلیلرین بیر نئچه سین گؤندردی دمیرقاپی دربنددن مؤمینه خانمی دا گتیریتدی.چنلی بئلده گون گئچیرمه یه، عؤمور سورمه یه باشلادیلار.


🌸سون🌸


📌حاضیرلایان : آشیقلار دونیاسی تلگرام کانالی


_______________________________________________

* آنادولو(تورکیه) تورکجه سینده قوردا ، کورد (Kurd ) دئییلیر. آنجاق ائله آنادولو دئییمیله کورداوغولو دئییرلر آمما ائله گؤزه گلمه سین کی بو کورد(Kürd) طایفاسیلا ارتباطی وار.


پنجشنبه 1399.2.4