آشیقلیق صنعتی

آشیقلیق مکتبیندن بیر گؤسته رگه

شعر

«آشیق تانینماق»

آشیق تانینماغین نئچه شرطی‌وار
بیری‌ادب،بیری‌سازدی،بیری‌سؤز
سؤزشاعیردن،سازاوستاددان،دَب‌ائلدن
دانیش،اوخو،چال،دئمه‌سین،‌بیری،سؤز


غَوّاص اولوب سؤزبَحرینده اوز،اؤیرَن
دوز ائشیت،دوز اوخو،دوزچال،دوز اؤیرن
پته کدن بال میثلی سؤزو،سوز،اؤیرن
ایثبات ائدر ،ایکی،اوچو،بیری،سؤز


هرکلمه‌نین تانی یئرین مقامین
دولدور سؤزشربتین دولاندیر جامین
«قیزیل‌قلم»تامسین خوش‌سؤزون‌طامین
اوره‌کلری سئویندیرر بیر ایی سؤز

«قیزیل‌قلم»

آردین اوخو
1398/2/17
بؤلوملر : شعرلر,

آشیق باهارعلی دن بیر احوالات _ نوروز بایرامی

آشیق باهارعلی دن بیر احوالات

 

 

 

 

   

        نوروز بایرامی یاخینلاشیر میلله تین ایچینده بیر قالماقال توشوب اؤزونو بایراما حاضیرلاییر. آمما بخت آدامینان یار اولمایاندا ، بایرامین آدی بئله عذابدیر!  نئچه آی اولار کی آشیق باهار هئچ بیر تویا گئتمه ییب و ایقتیصادی دورومو یاخشی دئییل و تکجه یئییب ایچمه یه بیر میقدار پول قالیب.بو احوالتدا بیر گون سحرچاغی قاپی چالینیب آشیق باهار اوره یینده سئوینیب کی اولمایا تویچو گلیب !؟

آمما آچیلاندان سونرا بللی اولوب بزازدی،گلیب حسابین آلسین . آرواددان سوروشوب کی بو نه بورجودو !؟

آرواد جاواب وئریر : نئچه گون قاباق آنام گلمیشدی یادیندا ؟

آشیق جواب وئریب : بلی .

آرواد دئییب : اولار منیم بایراملیغیمی گتیرمیشدیرلر. منده اونا گؤره بو بزازدان بیر دونلوق آلدیم آنام گیله گئدنده آناما پای وئرم.

گؤرور دای چاراسی یوخدو بزازی یولا سالیب گئدیر ، آمما باهارین احوالاتی پوزلوب فیکره دالیر ائله بونا دوشونورکن سازا گؤزو ساتاشیر آلیب گؤرک نوروز بایرامینا نئچه دئییب :

 

ائوه   سالیر    گؤر نه  تالان

گلنده      نوروز      بایرامی

اوشاغا      ساتیلیر     یالان

گلنده      نوروز      بایرامی


دئدیم  آرواد  بو  نه   هایدی

دئدی  دوستان  گلن  پایدی

دئدیم کاش قیچی سینایدی

گلنده      نوروز      بایرامی

 

نیسیه نی   بول    کسدیریر

بزازلارا     قول    کسدیریر

اسلحه سیز  یول  کسدیریر

گلنده      نوروز     بایرامی

 

نوروز   گلیر  گول لر   آچیر

بوشلولارین    رنگی   قاچیر

باشا  بؤیوک  بیر  درد  آچیر

گلنده      نوروز      بایرامی

 

بختی   آغدی    بنزیر   قارا

ایندی   قولاق    وئر  باهارا

بیلمیرم   باخ    قاچیم   هارا

گلنده      نوروز      بایرامی




تلگرام کانالیمیز : 

https://t.me/AshiglarDunyasi

آردین اوخو
1392/12/21
بؤلوملر : شعرلر,