آشیق باهارعلی دن بیر احوالات

 

 

 

 

   نوروز بایرامی قاباخدادی، هامی اؤزونو بایراما حاضیرلاییر.آمما بخت آدامینان یولداش اولمایاندا، بایرامدا گلسه ائله بیل كی بیر بؤیوك درد گلیب آدامی تاپیر. آشیقلیغین بازاری كساددی آشیق باهاردا اوبیریسی آشیقلار كیمین ائوده اوتوروب بیر تویچو گؤزله ئیر كی گلسین تویا آپارسین.بلكه بیر بئش اون تومن پول آلا بایرامی سووشدیرا.

   بو گؤنلرین بیرینده قاپی چالینیب ،آچیلاندان سونرا معلوم اولوب كی بزازدی ،گلیب كی بیر آز بورج حسابیندان آلسین. مجبورا اونی یولا سالیب باشلاییب آرواددان سوروشماقا كی بو نه بورجودو؟

آرواددا دئییب كی:یادیندادی بئش آلتی گؤن بوندان قاباق آنامینان قارداشیم گلمیشدیلر؟

آشیق جواب وئریب كی:بئلی، بو ایشین اونا نه ربطی واردی؟

آرواد دئییب كی: واردی نئجه یوخدو! اوگؤنو قارداشیم منه پای گئتیرمیشدی،اونا گؤره ده من بو بزازدان بیر چادیرالیق آلمیشام تا گئدنده ده ده م ائوینه بایرام _لاشماغا،سنین طرفیندن آناما پای وئرم.

آشیق ناچارلیغینان دئییب: آل آپار گؤره ك!

بو ایش، آشیغین احوالاتین پوزوب، اونو فكره سالیب. ائله بونا دوشونوركن، سینه سی جوشا گلیب،گؤروب بو دردی سازا دئمه سه اولمیاجاق.سازی آلیب سینه سینه بئله دئییب:

 

ائولره سالیرسان تالان،

گلنده نوروز بایرامی!

اوشاقا ساتیرام یالان،

گلنده نوروز بایرامی!

 

دئدیم آرواد بو نه هایدی،

دئدی دوستان گلن پایدی،

دئدیم كاش قیچی سینایدی،

گلنده نوروز بایرامی!

 

نیسیه نی بول كسدیریر،

بزازلارا قول كسدیریر،

اسلحه سیز یول كسدیریر،

گلنده نوروز بایرامی!

 

نوروز گلسه گؤللر آچیر،

بوشلولارین رنگی قاچیر،

باشا بیر بؤیوك درد آچیر،

گلنده نوروز بایرامی!

 

بختی آغدی بنزیر قارا،

قولاق وئر آشیق باهارا،

بیلمیرم باخ قاچیم هارا

گلنده نوروز بایرامی!

1392/12/21
بؤلوملر : یازیلار,