بایاتیلار

آذربایجان شفاهى خلق ادبیاتیندا بایاتى آدیله تانینمیش و یوردون هر طرفینه یاییلمیش دؤردلوكلر٬ اؤلكۂمیزده چاغلایان منظوم خلق ادبیاتى نوعلاریندن بیریدیر٠

بایاتیلار سؤز ییغجاملیغى٬ آنلام گنیشلیگى و موسیقى آخارلیغى ایله فولكلورون جذبه و دویغو دوغوران بدیعى اثرلرى سیراسیندا یئر آلیر٠

ساده خلقین حیات٬ قایغى٬ اۆرك سؤزو و احتیاجلاریندان مایالانیب و اولدوقجا آخیجى و صمیمى سؤزلرده فورمالانمیش بو گؤزل و جاذبۂلى نغمۂلر٬ ائله بیر اینجۂلیك٬ دوغمالیق٬ صافلیق و صمیمیت ایله یوغرولموشدور كى٬ اونلارا اویوشان آهنگ و توتوملو سسله اوخونورسا٬ اۆرۂیى جوشدورور احساسین اوزونه گؤز یاشى چیلۂییر.


 

 

 

 

 

 

 

 

 

 

 

 

 1

عزیزیم آلما قالا

بوشقابا آلما قالا

من سنى گیزلین سئودیم

سالدیلار قالما قالا٠

 

2

اوجاغى یاخشى قالا

اودون قوى٬ یاخشى قالا

نه اولار بو دونیادا

پیس اؤله یاخشى قالا٠

 

3

عزیزیم داشلى قالا

یوللارى داشلى قالا

نئجۂسن سالیم گئدیم

گؤزلرین یاشلى قالا٠

 

4

من عاشیق٬ آى جمالا

یار الدن آى جام آلا

گؤتور اوزدن اؤرتویون

باخیم بیر آى جمالا٠

 

5

یارى یوللادیم یولا

گؤزلریم دولا­دولا

بولودا چوخ یالواردیم

اوستونه كؤلگه سالا٠

 

6

عاشیق ناچار آغلاما

پیس گۆن كئچر آغلاما

فلك باغلى قاپینى

بیر گۆن آچار آغلاما٠

 

7

آغ خوروزوم بانلاما

آنا منى دانلاما

من گئدیرم وظیفه

سن منى نشانلاما٠

 

8

ساعاتى ترسه تاخما

دؤنوب دالییه باخما

اؤزون گؤر٬ اؤزون بۂین

ائللر سؤزونه باخما!

 

9

آغ آلما قیزیل آلما

نیمچۂیه دوزول آلما

چیركین آل نجیب اولسون

بد اصیل گؤزل آلما٠

 

10 

عارف اودى سؤز قانا

سؤز آنلایا٬ سؤز قانا

سنه سود وئرن آنا

اولسون منه قاینانا٠

 

11

عزیزیم٬ دالداسینا

مرد ایگیت دالداسینا

نامرد اصلان اولسادا

سیغینما دالداسینا٠

 

12

من عاشیقام آیینا

بندم قاشیق یایینا

قورخورام كیرپیك چالام

اوزوندن گؤز یایینا٠

 

13

باهاسیز داشدى دونیا

چوروك آغاشدى دونیا

كیمه دئییم دردیمى

بوتون قان­یاشدى دونیا٠

 

14

آرازى آییردیلار

قومونان دویوردولار

من سندن آیریلمازدیم

ظولمونن آییردیلار٠

 

15

من عاشیق یارالیلار

دردلیلر٬ یارالیلار

طبیبى بوردا گؤردوم

ییغیلین یارالیلار٠

 

16 

یول اوستونده وار چنار

یارپاغى دینار­دینار

چتین ایشه دوشموشم

قورتارسین پروردگار

 

17

باغلاریندا اوزوم وار

گئتمه٬ دایان٬ سؤزوم وار

گؤزلریندن قورخورام

قاشلاریندا گؤزوم وار

 

18

عزیزیم دغدغۂم وار

فیكریم وار٬ دغدغۂم وار

گؤردوم بیر داغ اییلیب

دئدیم او داغدا غم وار

 

19

بو داغدا مارالیم وار

اوخ دگمیش یارالیم وار

نه گئجه یوخوم گلیر

نه گوندوز قراریم وار

 

20

سؤزو سؤزدن آلان وار

زولفون اۆزه سالان وار

گئدیرسن تئز قاییت گل

گؤزو یولدا قالان وار

 

21

من عاشیغام٬ بیر آى وار

بیر اولدوز وار بیر آى وار

گونده گؤردویوم یارى

گؤرمۂمیشم بیر آى وار

 

22

قره داغین دۆزۆ وار

دۆزلرینده قوزو وار

ایكى گؤیول بیر اولسا

كیمین اونا سؤزو وار؟

 

23

نارینج ایدیم سیخدین یار

خاطریمى ییخدین یار

دوست­دوشمن آراسیندا

چوخ وفاسیز چیخدین یار

 

24

داغلار باشى توتوندور

كیمین قلبى بوتوندور

اییل اؤپوم اۆزوندن

دونیا اؤلوم ایتیمدیر

 

25

من عاشیغام٬ یاز گؤندر

پاییز گؤندر٬ یاز گؤندر

كاغاذ اله دوشمۂسه

یارپاق اوسته یاز گؤندر

 

 

1392/11/2
بؤلوملر : بایاتیلار,