آباد اولاسان سنی خالخال٬ یئل یاتمامیش٬ گرمیش قالخار.

آباد اولار بولبولویم٬ وئران اولار بایقوشویام.

آتا-آنا روشوتسیز دوستدولار.

آتا-آناسینا خئیری اولمایانین هئچ كیمه خئیری اولماز.

آتادان قالان مال شمع كیمی یانیب قورتارار.

آتا اولمایان آتا قدری نه بیلر؟

آتامین اؤله جاغینی بیلسئیدیم٬ قولاغی دولوسى دارییا ساتاردیم.

آت اله دوشر٬ مئیدان اله دوشمز.

آت اؤزومدن٬ دون اؤزومدن٬ بگه نوكرم!

آت اولاندا مئیدان اولماز٬ مئیدان اولاندا آت اولماز.

آت اؤلوب٬ ایتین بایرامیدیر.

آتدان دوشموشم٬ آددان كی دوشمه میشم!

آت دا یئددی گونده بلله نر٬ ایت ده یئددی گونده بلله نر.

آت كیمیندیر؟ مینه نین٬ دون كیمیندیر؟ گئیه نین.

آتی آت یانیندا باغلاسان٬ همرنگ اولماسا٬ همخوی اولار.

آتین آریغینا یابی دئیرلر٬ ایگیدین یوخسولونا دلی.

آج آداما یاوان( یالخی) چؤرك خوش گلر.

آج قودورغان اولار٬ چیپلاق اویناغان.

آج الینه دوشه نی یئیه ر٬ توخ آغزینا گله نی دئیه ر.

آج اؤلمز گؤزى قارالار٬ بورجلو اؤلمز اوزو سارالار.

آج كؤپك قودورماز.

آجیخان یاناغیندان٬ سوسویان دوداغیندان بلله نر.

آچیق آغیز آج قالماز.

آچیلمامیش سفره نین بیر عئیبی وار٬ آچیلمیشین مین عئیبی.

آخان قان داماردا قالماز.

آخشام اودونا گئدن چوخ اولار

آخشام اولدو یات٬ سحر اولدو چات

آخ وایینا ن چیخار كاسیبین جانی٬ اؤلنه جن دئیه ر آللاه كریمدیر.

آدام٬ آدامدیر اولماسادا پولو٬ حئیوان حئیواندیر٬ اطلسدن اولسادا چولو.

آدام اؤزى یونگول اولماسا٬ ائل ییغیلیب یونگول ائیله مز.

آداما سؤزى بیر یول دئیه رلر.

آدامدان ائشك اولماسا٬ ائششكین بیری مین تومنه چیخار.

آداملیق ماتاح دگیل كی٬ گئدیب بازاردان آلاسان.

آدامی تانییان یئرده قورد یئسین.

آدامین عغیللیسی بیر یووادان ایكی یول سانجیلماز.

آدامین یئره باخانی٬ سویون آستا آخانی.

آدیمی سنه قویارام٬ سنی یانا-یانا قویارام.

آدین ائشیت٬ اوزون گؤرمه.

آدین نه دیر؟ رشید. بیرین ده٬ بیرین ائشیت!

آدین نه دیر؟ نؤكر. بس نیه دورموسان بئكار؟ آچ قاپینی٬ اؤرت قاپینی.

آدین هئیبت الله دیر٬ یا منی قورخودورسان؟

آرالیق سؤزو ائو ییخار.

آرپانی تؤكوبلر ایتین قاباغینا٬ سومویو تؤكوبلر آتین قاباغینا.

آرپانی داشلی یئردن٬ قیزی قارداشلی یئردن.

آرپا یئیه ن٬ سامان یئیه ن٬ یول یئریمیه ن؟

آرتیق چیخار٬ ائو ییخار.

آرخالی كؤپك قورد باسار.

آرمودون یاخشی سینی مئشه ده چاققال یئیه ر.

آرواد ائلدن دیر٬ اوغول بئلدن دیر٬ آرا دا قارداش تاپیلماز.

آرواد ائوده ایكی اولسا٬ ائو سوپورولمه میش قالار.

آرواد بلادی٬ آللاه هئچ ائوی بلاسیز ائیلمه سین!

آرواد مالی٬ باش توخماغی.

آرواد نه بیلیر داغدا دوماندیر٬ ائوده اوتوروب حؤكمو راواندیر.

آرواد وار ائو یاپار٬ آرواد وار ائو ییخار.

آروادی اری ساخلار٬ پنیری دری.

آروادین یالاغی سمنی قویار٬ كیشینین یالاغی باققال دوكانی آچار.

آزاجیق آشیم٬ آغریماز باشیم

آزا دئدیلر هارا گئدیرسن؟ دئدی چوخون یانینا.

آزارلیق اولسون٬ بئزارلیق اولماسین!

آز سؤیله٬ چوخ دینله.

آز وئرسن كوسور٬ چوخ وئرسن قوسور.

آسان اله گلن٬ آسان دا الدن گئدر.

آشاغا باشدا اوتورمور٬ یوخاری باشدا یئر یوخدور.

آش تاپانمیر ایچماغا٬ چادرالی گئدیر سیچماغا.

آشی دادلاندیران یاغ اولار٬ آشپازین اوزو آغ اولار.

آشین بوشلوغو٬ دنین یوخلوغونداندیر.

آغا توخدور٬ نؤكره بیر چؤرك چوخدور.

آغاجا بالتا ووردولار٬ دئدی: ساپی اؤزومدندیر.

آغاج بوداغی ایله كوشولدار.

آغاج بار وئردیكجه باشینی یئره تیكر.

آغاج دیبیندن سو ایچر.

آغاج ییخیلاندا الی بالتالی چوخ اولار.

آغاجی اؤز ایچیندن قورد یئیه ر.

آغانین مالی چیخار٬ نؤكرین جانی.

آغزی اگرینی دالیدان تانیماق اولار.

آغزیمی یاندیران آش اولئیدی٬ باشیمی سیندیران داش اولئیدی.

آغزیندا یاخشی یئر ائله میسن٬ باغبان آرمود وئرسه.

آغ گؤت ایله قارا گؤت چایدان كئچنده بلله نر.

آغ گؤن آغاردار٬ قارا گؤن قارالدار.

آغلارسا آنام آغلار٬ اؤزگه سی (قالانی) یالان آغلار.

آغلامایان اوشاغا سود وئرمزلر.

آغیز یاندیران آش گئندن (اوزاقدان) بللی اولور.

آغیز دان چیخان باشا دگر.

آلاجاغی بیر پیلته٬ پامبیغین باتمانین سوروشور.

آلا قارغا سودا چیمسه قاز اولماز.

آلتمیش یاشیندا ساز چالماق اؤیره نن قییامتده چالار.

آلتی یاشیندا قیللی دانا٬ ایندی دوشوب مئیدانا.

آللاه آجین هئچ كیم دویورانماز.

آللاه اوغلون ساخلاسین دعوا ایسته مز.

آللاه ائششه یی تانیدی٬ بوینوز وئرمه دی.

آللاه ایسته سه وئرسین٬ سوروشماز كیمین اوغلوسان.

آللاه بالاوی ساخلاسین دعوا ایسته مز.

آللاه بو گؤزو او گؤزه محتاج ائله مه سین!

آللاه بیر اوبادا ایكی ایتین آدینی بیر ائله مه سین!

آللاه داغینا باخار قار وئرر.

آللاه دوه یه قاناد وئرسه ایدی٬ دام-دوواری ییخاردی.

آللاه ساغ گؤزو(الی) سول گؤزه (اله) محتاج ائله مه سین.

آللاه وئردیكجه بنده گومانا دوشر.

آللاه هئچ یاتانین دالینجا اویاق ائله مه سین!

آللاه قوجالیق ایله یوخسوللوغو بیر یئره سالماسین!

آل٬ وئر دئیبلر٬ آل وئرمه دئمه یبلر.

آلیجی قوش دیمدیگیندن بللی اولار.

آلیزلادی٬ اؤلمه دی٬ اوزولدو٬ اؤلدو.

آلانا قدر اوغلان ائوی٬ اؤلنه قدر قیز ائوی.

آمان دیله یه نی اؤلدورمزلر.

آنا بالادان اولماز٬ مگر آیری سالالار.

آناسی چیخان آغاجلارى٬ قیزی بوداق-بوداق گزر.

آناسینا باخ قیزینی آل٬ قیراغینا باخ بئزینی آل.

آنا كیمی یار اولماز٬ وطن كیمی دیار.

آنالی قیزین اؤزو بؤیویر٬ آناسیز قیزین سؤزو.

آنانین امجه یین بوراخیب٬ دایی نین داششاغیندان یاپیشیب.

آنانین اوره یی یانار٬ تایانین اته یی.

آنلامازا سؤز قاندیرماق٬ دوه یه خندق آتداتماق.

آنالامازا دئسن قولونام٬ دئیه ر٬ گل آپاریم ساتیم سنی.

آنلایان اؤزو آنلار٬ آنلامازی ها قاندیر.

آنلایانلا داش داشی٬ آنلامازلا بال یئمه!

آنلایانین قولو اولاسان٬ آنلامایانین آغاسی دا اولمایاسان!

آیاق یالین تیكان درمك چتیندیر.

آیاق بیر-بیر قویارلار نردووانا!

آیاغینین بیری بو دونیادا٬ بیری او دونیادا.

آیا او قدر باخما٬ گلسین دوشسون آیاغینین آلتینا.

آی داش آتان بخته ور٬ داشین دا بیر واختی وار.

آیدان ایلدن بیر ناماز٬ اونودا شئیطان قویماز.

آیرانیم بودور٬ یاریسی سودور. ایچسن ده بودور٬ ایچمه سن ده.

آینایا نئجه باخارسان٬ اؤزونو هایلا گؤررسن.

آیی بوغولاندا(برك آیاقدا) بالاسینی آیاغی آلتیندا آلار.

آییدان بیر توك ده چكسن غنیمتدی.

آیین اون بئشی قارانلیق اولسا٬ اون بئشی آیدینلیقدیر.

آیی نین اله دوشه نینی اوینادارلار.

آیی نین مین بیر اویونو وار٬ بیر آرمود اوسته چیخاردار.

ابله اودور دونیا اوچون غم یئیه٬ تاری بیلیر كیم قازانا كیم یئیه.

اجل دئدیگین گؤزونن قاش آراسیندادیر.

اجلی یئته ن كئچی بوینوزونو چوبانین دگه نگینه سورتر.

ار-آرودین ساواشی٬ یای گونونون یاغیشی.

ار٬ اری یولداشلیقدا٬ ائو٬ ائوی قونشولوقدا تانیر.

اردبیل بیر شهردیر٬ هر كسه ن اؤز وكیلی.

ارینجه بئزی كیمی نه ائنه یارار٬ نه بویا.

اركك سن ده دوغ٬ دیشی سن ده دوغ!

اكینین سوتول یئیه ن٬ خیرمن واختی سوله نر.

الدن توتان (یاپیشان) آز اولار٬ آیاقدان چكن چوخ.

ال٬الی یویار٬ ال ده دؤنر اوزو یویار.

الی كسیك٬ الی كسیگی تانیر.

الیندن ایش گلمیه ن٬ زورو دیلینه وئرر.

الینن آچیلان دوگونو دیشیوه سالما!

الینی قاتدین حراما٬ توربانی دولدور قالاما.

اللی یاشیندا قیللی دانا٬ ایندی دوشوب مئیدانا.

امیر بازاری یانسین منه (سنه) بیر دستمال چیخسین!

ارمنی دئیه ر: موسلمان دانیشاندا اوتانار٬ یامان دئینده اوتانماز.

اصلانین اركك دیشیسی اولماز.

اصیلی تاپماق چتیندیر٬ ساخلاماق آسان.

اصلی اولماسایدی٬ كرم چؤللره دوشمزدی.

ات دیرناقدان آیریلماز.

ائشیتدیگینی اونود٬ گؤردوگونو توت!

ائششكدن سوروشدولار: گونده نه قدر یول گئدرسن٬ دئدی: اونو بیزدن سوروش.

ائششك گتیر٬ معركه یوكله!

ائششگه دئدیلر: معرفتینی گؤستر٬ ییخیلدی٬ كوله آغنادی.

ائششگه گوجو چاتمیر٬ پالانینى دؤیور (تاپدالیر).

ائششگیم اؤلمه یونجا بیتینجه٬ یونجام سارالما توربا تیكینجه.

ائششگین جانی آغرییاندا (اینجیینده) آتدان یئیین گئدر.

ائشییه چیخیرام تاری دؤیور٬ ایچری گیریرم قاری دؤیور.

ائل آتان داش اوزاغا گئدر.

ائل آغزی٬ چووال آغزی.

ائل اوچون آغلایان گؤزدن اولار.

ائل اؤز دلیسین یاخشی تانیر.

ائل-ائله سیغیشار٬ ائو-ائوه سیغیشماز.

ائلچیسی گولوم اولانین باشینا كولوم اولار.

ائل سئوه نی هامی سئور٬ ائل دؤیه نی هامی دؤیر.

ائل گؤزو ترازیدیر.

ائللره گولن جانیم٬ ائل منه گولر اولدو.

ائله بیل دوه نالبنده باخیر.

ائله شور ایدی كی٬ خان دا باشا دوشدو.

ائله سؤز دانیشیر كی٬ پیشمیش تویوغون گؤلمه یی گلیر.

ائله یئرده اوتور كی٬ دئمه سینلر دو بوردان.

ائوینده یوخ اوروالیق٬ گؤیلوندن گئچیر دارغالیق.

ائوینی یاخشی ساخلا٬ گؤزلنیلمز قوناقدان.

ائو ییه سی ائوینین قیبله سینی یاخشی تانیر.

ائو ساتان بیر ایل دؤولتلی اولور٬ ائو آلان بیر ایل كاسیب.

ائی واى اؤلنلر٬ بیر پونزا اتی یئددی بؤلنلر.

او آند ایچدی٬ بو آند ایچدی٬ اوسدوراق بوینوما دوشدو.

او اوز سنین٬ بو اوز منیم!

اوت كؤكو اوسته بیتر.

اوتورا-اوتورا اوزانین (عاشیغین) ائوی ییخیلار٬ گزه-گزه جولفانین.

اوتوز ایكی دیشدن چیخان٬ مین اوبایا یاییلار.

اوجاقدان كول اسكیك اولماز.

اوخ كی كماندان چیخدی٬ گئده جك یوخ چاراسی.

اوددان كول تؤره ر٬ كولدن اوت.

اودون گتیر٬ سو گتیر٬ اوشاق ایشه دی٬ گل گؤتور!

اود هر یئره دوشسه٬ اؤزونه یئر آچار.

اوراغی قیشدا آل٬ كوره یی یایدا.

اوروج توتما٬ ناماز قیلما٬ ایشین بئله راست گلسین!

اوغرو قالانا یانار٬ ائو اییه سی گئدنه.

اوغرودان سالدیرانی رمدار آپارار.

اوغورلوغونون اولی٬ اودا دوشدو آی ایشیغینا.

اوغول فرلی اولسا٬ نئیله ییر دده مالین.

او قدر اؤلمه دیك كی٬ گوردان خبرچی گلدی.

اولار آشیم سویو٬ اولماز باشیم سویو.

اولان یارما قاینادار٬ اولمایان بارماقلارین اوینادار.

اولاندا گؤز قیزارار٬ اولمایاندا اوز قیزرار.

اون ایكی اماما یالوارینجا٬ بیر آللاها یالوار.

اوندا كی واریم ایدی٬ كئچی قیلی شالواریم ایدی٬ ایندی كی یوخوم اولوب٬ ایتلر منه قارداش اولوب.

اوها  وار داغا میندیرر٬ اوها وار داغدان یئندیرر.

اویناشا بئل باغلایان ارسیز قالار.

اؤرتولو بازار٬ دوستلوغو پوزار

اؤز چؤره یینی اؤزگه سوفراسیندا یئمه!

اؤز گؤزونده تیری گؤرمور٬ اؤزگه گؤزونده چؤپو گؤرور.

اؤزگه آتینا مینه ن تئز دوشر.

اؤزگه اوغلوندان اوغول اولماز٬یئیه ر ایچر٬ قویار قاچار.

اؤزگه نین اؤرده یی قاز گؤرونر٬اؤزگه نین تارلاسی دوز گؤرونر.

اؤزوم اؤزومه ائیله دیم٬ كولو گؤزومه ائیله دیم.

اؤزون كور اولسان دا٬ ووروشون كور ووروشونا اوخشامیر.

اؤزونه اوماج اووانمیر٬ اؤزگه سینه اریشته كسیر.

اؤزونه ایگنه باتیر٬ یولداشینا چووالدوز.

اؤزووی یورولموش بیلسن٬ یولداشووی اؤلموش بیل.

اؤزو ییخیلان آغلاماز

اؤكوز اؤزونه یونجا (كوروشنه) اكنده باشی آغرییار.

اؤكوزون تایدی٬ ایشین ضایدی.

اؤلسون او یامان كی٬ یئرینه یاخشی گله.

اؤلو اؤلدو اؤز بورجونو اؤده دی٬ وای قالانین حالینا(گونونه)

اؤلو دوروب٬ میرده شیری یویور.

اؤلولر ائله بیلیر دیریلر حالوا یئییر.

اؤلوم بیر شربتدیر كی ٬هامی اونو داداجاق.

اؤلن ایله اؤلمك اولماز.

اوجوزدان باهاسی اولماز.

اوجوز اتین شورباسی اولماز.

اوجوزلوقدا آلانین٬ باهالیقدا ساتانین اوزون گؤرمه!

اوتان اوتانمازدان٬ قورخ قورخمازدان.

اوتانماسان اویناماغا نه وار؟

اوتانیرسان اوزووه بیر الك چك!

اوزاقدان باخانا دؤیوش آسان گلر.

اوزون٬ اوزون آرزیلار٬ قیسا٬ قیسا عؤمورلر.

اوستاسینا كج باخانین گؤزلرینه آغ گلر.

اوشاغا بویور٬ دالینجا یویور.

اوشاغیم اوشاق٬ یئكم ده اوندان اوشاق!

اوشاغیم عزیز٬ تربیه سی اوندان عزیز!

اوشاق آتادان یئتیم قالماز٬ آنادان یئتیم قالار.

اوشاق آتاسیندان گوجلوسونو بیلمز.

اوشاق ائوین یاراشیغیدیر.

اوشاقسیز ائو بارسیز آغاجا بنزه ر.

اوشاق واردینی٬ یوخدونو بیلمز.

اولدوزو باریشانین سؤیوشوده سلامدیر٬ اولدوزو باریشمایانین سلامی دا سؤیوشدور.

اولو سؤزونه باخمایان٬ اولویا-اولویا قالار.

اومان یئردن كوسرلر.

اوچ گئجه لیك آیی هامی گؤرر.

اوز٬ اوزدن اوتانار.

اوزلو داش یئرده قالماز

اوزلو قوناق اؤزو اوتانماز٬ ائو یییه سینی اوتاندیرار.

اوزمك بیلمیرسن چای قیراغیندا نه گزیرسن؟

اوركدن اوره یه یول وار.

اوزونه باخیرسان حوری-پری دیر٬ ایچینه باخیرسان قیللی دری دیر.

اوز وئرنده آستارینی دا ایسته ییر.

اوزده خالا٬ دالدا دا دردبلا!

اوزو بزك٬ ایچی تزك.

اوزوملو باغین اولسون٬ گؤره سن بیلدیرچین نئجه قوشدور.

اوزونو ساخلا اوزسوزدن.

اوز وئرسن قوهوملوق ادعاسی ائلر.

ایپ قیریلمیر٬ جاخ چیخمیر.

ایپ نه قدر اوزون اولسا٬ یئنه دوواناق كئچر.

ایت آج قالاندا كؤهنه كوللوكلری آختارار.

ایت الیندن سوموك گمیرمك اۏلمور.

ایت اۏلاسان٬ كیچیك قارداش اولمایاسان!

ایت ایت ایله دالاشار٬ قورد گؤرنده آرخالاشار. 

ایت ایتلیغیندان ال چكسه٬ سومسونماغیندان ال چكمز.

ایت ایكی سوموك تاپاندا بیرین دالی گونونه ساخلار.

ایت بورنو دا اؤزونو میوه سانار.

ایت چؤركچیدن بیر كوت آپارار٬ اؤز آیاغینی كسر.

ایت ده گئتدی٬ ایپ ده گئتدی.

ایت سومویو سئوینه-سئوینه اودار٬ وای اوندادی چیخارداندا.

ایت قورساغی یاغ گؤتورمز.

ایت نه قدر كؤك اولسادا٬ قورمالیغا یاراماز.

ایته دئدیلر: نیه هورورسن؟ دئدی: قورخودورام٬ دئدیلر: نیه انسه ن گئدیر؟ دئدی: قورخورام

ایت هوردو چرچی گلدی٬ ائله بیلدیم ائلچی گلدی.

ایت یاتار قایا كؤلگه سینه دئیه ر بس اؤز كؤلگه سیدیر.

ایتین آخماغی قئیساوادان پای اومار٬ اونو دا چینی قابدا.

ایچدین اوزوم سویونو٬ تؤكدون اوزون سویونو.

ایچه ریم اؤزومو یاندیریر٬ ائشیگیم اؤزگه لرى.

ایسته دی قاشین دوزلتسین٬ ووردوگؤزون چیخارتدی.

ایستیری سودان كئچسین٬ آیاغی دا ایسلانماسین.

ایش ترسینه گلنده٬ تر حالوا دیش سیندیرار.

ایشلمیه ن ٬ دیشله مز.

ایشدن آرتماز٬ دیشدن آرتار.

ایشلر بازیلاریم٬ یئیه ر آزیلاریم.

ایشین یوخدور شاهد اول٬ پولون چوخدور ضامن اول.

ایكی آروادلی ائو سوپورلمه میش قالار.

ایكی آروادلی كیشی گئجه نی شامسیز یاتار.

ایكی آروادلی كیشىنین آغزینین دادی اولماز.

ایكی آغیز بیر اولسا٬ بیر آغیز هئچ اولور.

ایكی الین وار٬ ایكیسینی ده بورج ائله باشینیی قئییم ساخلا.

ایكی باشلی جاناواردان چكینمه(قورخما)٬ ایكی دیللی آدامدان چكیل!

ایكی دانا بیت٬ بیردانا بیره٬ كدخدانی سالدیلار گیره.

ایكیسی ده بیر بئزین قیراغیدیر.

ایكی قیرانلیق ائششه یین اون شاهلیق دا قودوغو اولار.

ایكی گؤیول بیر اولسا٬ كیمین اونا سؤزو وار؟

ایلان ووران (چالان) یاتار٬ آج یاتماز.

ایلان چیخدیغی باجانی یاخشی تانیر.

ایلان ووران آلا چاتیدان قورخار.

ایلان هر یئره اگری گئتسه٬ اؤز یوواسینا دوز گئدر.

ایلانین آجیغی یارپیزدان گلیر٬ اودا یوواسی آغزیندا بیته ر.

ایلانین یاخشىسینا دا لعنت٬ پیسینه ده.

1392/11/1
بؤلوملر : آتالارسؤزو ,