چیلله پایی !
پاییزین سون گونونده
سس سیز باغین ایچینده
یارپاقلاریندان خالی
سرمیشدی قیزمیز،ساری
بیر آغاجین باشیندا
بؤیوک قیرمیز بیر آلما
هاردان نم_نئجه اولموش
بو گؤزل آلما قالمیش
آغاجلارین آلتیندان
دوم _دورو سویو اولان
بالاجا آرخ واریمیش
ایچینده جان جارییمیش
بیردن_بیره یئل اسیب
باغی دؤرد_دؤره گزیب
یئتیشیب تک آلمایا
قوپاریب سالیب سویا
دوشنده گؤزون آچیب
یان _ دؤره سینه باخیب
هر یانی قیش بورویوب
یام یاشیللار چورویوب
اؤز _اؤزونه دوشونوب
او آن اورک اوشونوب
او یاشیللیقلار هانی
نئجه اولوبلار هانی؟!
دوشونورکن بونلاری
یولو اولموشدو یاری!
آخشاما بیر آز قالان
گون باتمادان قاباق آن
یئتیشیب بیر قاپییا
ایلیشیب بیر بوتایا
او قاپینین قاباغی
بالاجا قیز اوشاغی
آتاسی نی گؤزلوردو
یولدان گؤزون اوزموردو
یورولوب گؤزله مک دن
آیاغا قالخیب بیردن
گلیب آرخین یانینا
بئله دئییب سویونا :
آی آخارلی دورو سو
گوندوز آخشام اولوبدو
هاردا قالیبدیر آتام
نه زامان اونا چاتام
دئدی گئدیم بازارا
اولمایا دوشوب دارا !؟
اوزون چئویریب گئده
ایشینه داوام ائده
بوتانین دیبینده کی
او سویون ایچینده کی
باغدان گلن آلمانی
قیرمیز، الوان آلمانی
گؤره‌نده چوخ سئوینیب
گؤتوروب ائوه گئدیب
آناسی دئییب هاردان
نازلی قیزیم آلمیسان؟
دئدی آی گؤزل آنام
آرخدان پاییم آلمیشام !
سویا سالیبدیر خالیق
منه اولوب بایراملیق
بو زامان گلیب آتا
الی بوش اوزو قارا !
گون باتدی چاتدی گئجه
قار یاغدی چیخدی دیزه
اوتوردولار کورسوده
بؤلوشدولر سوفره ده
یئییب شوکر ائیله دیلر
چیلله باشا وئردیلر.
✍️ حامد بالکانلو
