آشیق امراه (  Aşıq Əmrah)

 

 

 

 

   آشیق امراه(امراه پاشا اوغلو گول ممداو) 1908 –جی ایلده بورچالینین كوروستو كندینده آنادان اولوب.سازچالماغی اوشاق یاشلاریندا آتاسی پاشا كیشیدن اؤیرنمیشدی.سیندی بولوغا چاتاندا آتاسی اونو دؤرونون سئچیلیب _ساییلان اوستاد صنعتكاری آشیق مه سیمین (مه سیم یادیگاراو)یانینا شاگیردلیگه قویور.

   امراه گول ممداو آشیق مه سیمین یانیندا یئتیشدیك جه،آشیق صنعتی نین سیرّلرینه داها یاخیندان بلد اولور و ائل هاوالارینین ماهیر ایفاچیسینا چئوریلیر. بئله لیكله او، اؤز صنعتینی اینكیشاف ائتدیره رك، یوكسك زیروه لری قالدیرماغا موفق اولور.

   آشیق امراه 1930 _جی ایللردن بورچالینین اَن بؤیوك ائل شئنلیكلرینده سسلندیردیی هاوالار و ماهنیلار آرتیق 50 _جی اییلردن باشلایاراق باكینین رادیو دالغلاریندا وگئنیش كنسرت سالونلاریندا سسلنیر.

   1959 _جی ایلده موسكودا كئچیریلن آذربایجان ادبیاتی واینجه صنعتی اون گونلویونده كی ایشتیراكی،اونون اوستاد آشیق كیمی داها دا مشهورلاشماسینا باعیث اولدو.

   1961 _ جی ایلده آذربایجان آشیقلارینین 3_جی قورولتاییندا، 1966 _ جی ایلده آشیق علسگرین یوبیله ئینده(خاطیرلاما)، 1984_جی ایلده آذربایجان آشیقلارینین 4_جی قورولتایینندا آغ ساققال اوستاد_آشیق كیمی همیشه لیك یاددا قالان چیخیشلاری اولموشدور.

   آشیق امراهین بیر صنعتكار كیمی بؤیوكلوگو هم اوندادیركی، او، چالیب اوخوماقلا یاناشی ماهیر ساز رئفورماتوروئیدی(یئنی دن قوشان). متخصصلرین نظری بیر اولوب كی صادیقجانین ترده كی یئنیلیكلرینی آشیق امره سازدا ائتمیشدی.

   بؤیوك اوستادین چوخلو شاگیردلری اولموشدور. آمما اونون یئتیشدیر دیگی آشیقلاردا اَن مشهور وهمیشه یاشار،ساز_سؤز اوستاسی، آشیق كامانداردیر.

  آشیق امراه صنعتكاریلغینین اوجالیغی هم ده اوندادیركی، تدقیقاتچیلارا معلوم اولان 72 ساز هاواسینی اینكیشاف ائتدیریب تكمیللشدیره رك اونلارین ساییسینی 81 چاتدیرمیشدیر. او،ایلك دفعه اولاراق "یورد یئری" ،"سوسنبری"، "توراجی" و ... وقدیم بورچالی هاوالارینی برپا ائده ره ك سسلندیرمیشدیر.آشیق امراه 1987 _جی ایلده وفات ائتمیشدی.

 

 

گل گؤروم

یولداشیمسان ، اللی ایلدی، تئللی سازیم ، گل گؤروم

مجلیس قوردوخ،دووران سوردوك،چكدین نازیم،گل گؤروم

گونوم كئچیر ، ویداع یئتیر ، سندن  آرالانیرام

ائل ایچینده بو دردلره نئجه دوزوم  ، گل گؤروم.

 

جاوان واختی بیر آن اولسا سنی الدن قویمادیم

زیل بمینله سینه م اوسته آوازیندان  دویمادیم

عاریف لره جان دیئردیم ، آنلامازی سایمادیم

سنده گزدی بارماخلاریم دوزوم دوزوم ، گل گؤروم.

 

چوخلار سنه قیمت وئردی ، سندن آلدی ایلهامین

شیرین سؤزون، خوش آوازین اولدو  آغیزلار تامی

تانیتدین آشیق امراها قوهوم ، دوستو، ائل هامی

عومور بویو سنه باخدی ایكی گؤزوم ، گل گؤروم.

 

 

 

بوداغلاردا

صیّاد اولان شیكار گه زه ر

بو داغلاردا ، بوداغلاردا

شاعیر اولان شئیر یازار

بو داغلاردا ، بو داغلاردا

 

یازدا یایلاغا كؤچه سن

یوردون خاصیندان سئچه سن

سرین سولاردان ایچه سن

بو داغلاردا ، بوداغلاردا.

 

آشیق امراه سؤزون مئزه

یارینان ایله شیب دیز _دیزه

باشلایاسان سازا _ سؤزه

بو داغلاردا ، بوداغلاردا.

 

 

 

داغلار

آرزولاییب گلدیم سنه

نه تحفه ن وار بیزه ،داغلار

حییف گلدیم یار ، یولداشسیز

دردیم اولدو  ته زه ، داغلار.

 

شاعیر، آشیق قوناق گلیب

شئیر دئییب ، سازدا چالیب

دومان _ جاندان ایلهام آلیب

باشلاییب لار سؤزه ، داغلار.

 

یازدا _ یایدا  وار  ییغناغین

بو  آیلار  كسیلمز قوناغین

قارا  خاتین ،  قوزقولاغین

دهانلاردا   مزه ،    داغلار .

 

قایالارین  قاطار  قاطار

باشین  بولودلارا چاتار

اومید  واركی، عومور آرتار

امراه سنده  گزه، داغلار.

 

 

 

 

گؤره نده

كؤنول عاشیقیندن مین ایلهام آلار

یول كناری  گؤزل  یاری   گؤره نده

رحمیسیز ، اجل سیز آلیر جانیمی

آلا گؤزلو   شوخ  دلداری  گؤره نده.

 

گلسه گؤز اونونه او مئهریبانیم

ایتر عاقل_هوشوم،گئده ر  ایمانیم

درد قانان گؤزه له قورباندی جانیم

دوز پیمانی ، دوز ایلقاری گؤره نده.

 

یار یارین حسرتین هر زامان چكر

دردلینین دردینی، درد قانان چكر

امراه جانین وئره ر ، نه آمان چكر

یاخشی دوستو ، هوادارین گؤره نده.

 

 

 

 

 بیلمزسن

آشیقلیق دئیلن بؤیوك صنعتدی

قیفیل بند  دئیللر یوزه بیلمزسن

مجلیسده اگله شیب نئچه خئریدار

اوچجه كلمه سؤزه دوزه بیلمزسن.

 

تا اوستاد اولمامیش چیخما اوبایا

ناشیسان چوخ دوچار اولما كاوقیا(داعوایا)

كامیل اوستاد سنی آتار دریایا

قاوواز اولوب اوردا  اوزه بیلمزسن.

 

گل امراها قوللوق ائیله درسین آل

جفا چكن صفا سوره ر ، وار میثال

یاخشی اویرن،یاخش اوخو،یاخشی چال

شاز گؤتوروب الده گزه بیلمز سن.

 

 

 

 

كسیلدی

عومورون باخچاسیندا بیر باغ بسله دیم

گول آچاندا اونون تاغی كسیلدی

دوشمن ابلیس اولدو ،دوست غیبت پرست

بیچاره جانیما یاغی كسیلدی.

 

مرد اولانلار  هئچ دانیشماز پونهانی

اوزونه عار بیلر هجوی _ هدیانی

مجلیسلر باشیندا دوسلاریم هانی

شن عومرومون بو نؤوراغی كسیلدی.

 

امراه آشیق اولدی اوبالار گئزدی

نئچه یاغیلارین  باغرینی  ازدی

دوستون حسرتینه ایللرنن دؤزدو

قاپیمیزدان دوست آیاغین كسیلدی.

 

 

1392/11/5